Peter Balogh Orchestra – Te somas barvalo

Peter Balogh Orchestra hino o bašavibnaskro ansamblos kerdo andro berš 2017, kerďas les u o artistikano direktoris hino o lavutaris Peter Balogh phureder. O lavutara andro orchestros pen paruven, no e intrepetačno kvalita ačhel sakovar uči. O repertoaris učharel buchlo žanrovo spektrum, nekbuter e filmoskri muzika, e opereta, džez, o ungriko folkloris the o evergreena.

O video sikhavel sar bašade e kompozicija If I Were a Rich Man (Te somas barvalo), savi sas kerďi andro berš 1964. E melodija kerďas o americko kompozeris Jerry Bock, o lava pisinďas o lekhavno Sheldon Harnick. E giľi pisinde vaš o muzikalos O lavutaris pro dachos, e giľi hiňi kerďi sar e tradično židoviko muzika.

O džene andro orchestros u pre soste bašaven:

Peter Balogh phureder – e angluňi lavuta
Peter Balogh terneder – e lavuta
Mario Balogh – e lavuta
Samuel Balogh – e bari bugova
Vladimír Plachetka – o piano

Kerdo andro Teatro Viola, Prešov, 8.12.2025

Dokumentimen: 8. decembros 2025