Milo Suchomel Orchestra – Jazz in The City 2.

Milo Suchomel sikhavel o bašaviben u hino aktivno bašaldo (pro saksofonos), savo kerel primarno o džezova žanri. Andro berša 1989 – 1995 phirelas pro Štatno konzervatorijum Žilinate, andro berša 1997 – 2000 phirelas pro Konzervatorijum Bratislavate. Andro berš 2001 sas jekh berš pro študijum pre Univerzita andro Louisville andro štatos Kentucky, USA. Buterval bašavel andro buter bašavibnaskre ansambli, kerel o koncertna kompoziciji the filmovo bašaviben, chudľas vaš peskri buťi buter moľipena. O video sikhavel o koncertos savo pes vičinel Jazz in the City u leskre akharde, sas andro klubos Babylon Bratislavate. Pro koncertos bašade o inštrumentalna bašavibena, solo bašavibena le akharde dženendar u giľade kompoziciji. O video hino e charňarďi verzija originalno koncertostar – o dujto kotor savo sas sikhado andro RTVS andro berš 2021.

Dokumentimen: 27. apriľos 2014