Eňa ori rači – E folklorno kapela Július Žigaskri

E kapela keren o džene andal e Žigaskri fameľija Gelnicatar: o dad Július, leskre čhave e Bohdana u o Filip. O napermanentna džene hine Vladimír Plachetka, Kristián Bandy the Július Bandy. Savore avri phirde o konzervatoriji, bašaven profesijonalno. E Bohdana Žigovo the o Filip Žiga sas maškar o štipendista andre organizacija Divé maky.
E giľi Eňa ori rači hiňi o halgató. Pal o ajse giľa e romistka Milena Hübschmannová (1988) phenel, hoj ola hine o giľa, kaj o lava hine zoraleder sar e melodija, vašoda, hoj andre giľi o manuš šaj phenel savoro. Andre kadi giľi e phen phenel le phraleske, hoj daral pal peskro dživipen u mangel les hoj la te arakhel.

Ko pre soste bašavel: Július Žiga – e bari bugova, Bohdana Žigová – e cikňi bugova, giľavel, Filip Žiga – e lavuta, Július Bandy – e cimbalma, Kristián Bandy – e viola, Vladimír Plachetka – o akordeonos.
O video sas kerdo 11.12.2021 andro Centrum vaš e slobodno kultura Wave andro Prešov.

Dokumentimen: 11. decembros 2021