Martin Kukučín – E ľoľi guruvňori

Audio

Martin Kukučín, peskre naveha Matej Bencúr (1860 Jasenová, Slovaťiko, purano Rakusko-Uhorsko – 1928 Pakrac, purano Thagaripen le Srbengro, Chorvatengro u Slovincengro) hino o šerutno reprezentantos vaš o slovaťiko literarno realizmus. Leskri buťi pes dikhel sar bari inovativno andre oda, so anďas la slovaťiko čhibake. Kukučín andro leskre lekhavipena iľas e vakerďi čhib u jekhetanes oleha sar sikhaďas sakoďivesutno the ineposkro dživipen pro gav, detaili andal o dživipen sar e suverenno tema, thoďas e vakerďi slovaťiko čhib opre sar e literarno čhib.
O lekhavipen Ľoľi guruvňori pisinďas andro berš 1885. Imar andro kada kriticko no lokho lekhavipen, savi džalas anglo tradično bilačhipen – alkoholizmus, pes pherdes sikhaďas le autoriskro talentos vaš o vakeriben u vaš o humor. Prekal oda, so pes ačhelas le tipicko gavutne manušeske – Adamoske Krtoske, savo kerelas o bočkori, u savo so jekh ta buter perel zoraleder andro alkoholizmo, so pes sikhavel pre leskri goďi u sar pes ľikerel aver manušenca, sikhaďas o autoris jekh serija pharipena the pherasa so pes ačhile.
O scenaris vaš e dramatizacija kerďas Roman Goroľ andre romaňi čhib direktno. E čhibakri korektura, e režija, o bašaviben, e technicko postprodukcija kerďas o kotor dokumentačno-informačno centrum vaš e romaňi kultura andre Štatno džaňibnaskri kňižňica andro Prešov andro berš 2018.

Dokumentimen: 19700101

Kategorija: