Vojtech Kӧkény – Autoportretos

O čitro pro phal baro 32 cm x 45 cm hino o autoportretos le čitroskro autoriskro. O čitro pes vičinel „Autoportretos“. E technika hiňi o čitripen le farbenca. O autoris hino Vojtech Kökény. Pro čitro hiňi e signatura, o berš kana sas kerdo hino 1988. O čitro sas andre kolekcija andre themutnengri organizacija Jekhetane-Spolu, savi delas phiko le romane čitratunenge andre lengri buťi.

PhDr. Vojtech Kökény (Kökény Kotyer Béla) uľiľas andro berš 1956 andre romaňi osada paš o gav Cakov, nadur khatar e Rimavsko Seč, andre lavutarengri fameľija. But berša kerelas e buťi sar o buťarno pro ačhavibena pre Slovaťiko the avri. Kerelas o čitratuňipen, e politika the o lokalno aktivizmus. Sar korkoro andro jekh vakeriben phenel, načitrinďas but buťa. Čitrinelas le ceruzkenca, paňeskre the oľejovo farbenca. Peskre buťa sikhavelas nekbuter andre Romaňi phirďi galerija, savi kerelas e Themutnengri asocijacija Jekhetane-Spolu kaj e šerutňi sas Daniela Hivešová-Šilanová. Le beršestar 1995 dži o 2005 kerelas buťi sar o socijalno buťarno pre Okresno kher andre Rimavsko Sobota.
Sas o dženo andre sera Romaňi themutnengri inicijativa (ROI), paľis geľas andre sera Romaňi inteligencija vaš o jekhetano dživipen (RIS) u e politicko karijera agorinďas andre Romaňi kolačno sera (SRK). Andro beš 2005 kerďas e kandidatura pro šerutno andro Banskobystricko samospravno krajos.

Dokumentimen: 22. februaris 2022