O autoris, savo čitrinďas o portretos hino o romano čitratuno Jozef Fečo. O portretos sas kerdo prekal o projektos Romano teatro – o garude moľipena andre nekhbareder minorita andro Vyšehradsko regijonos / Roma Theater – Secret Values of the Largest Minority in the Visegrad Region (2020), savo chudľas o financiji andal o Maškarthemutno vyšehradsko fondos. O materijalos pro savo hino o čitro hino o pochtan, o portretos phirel andro žanros street art. O čitro hino baro 100 cm x 120 cm. O čitro hino andro ramos.
JÁN CIBUĽA
Uľiľas 1.1.1932 Klenovciste. Andro berš 1957 agorinďas e Medicinsko fakulta pre Univerzita Komenskiskri Bratislavate. Sas doktoris pre Slovaťiko, andre puraňi Ňemciko demokraticko republika u le beršestar 1968 andro Bern andro Švajčiarsko. Andro berš 1971 sas jekh organizatorendar vaš o kongresos le Romengro andro foros Orpington andre Bari Britanija, kerde e Internacijonalno Romani Unija, le beršestar 1978 sas buter berš lakro prezidentos. Sas o šerutno andre delegacija romane reprezentantengri andro OSN, kaj o IRU chudľas o štatutos sar o dikhado. Andro 1985 chudľas o Kulturno moľipen le forostar Bern, sar o dujto avrutno andre foroskri historija, o jekhto sas Albert Einstein. Andro berš 2008 sas o kandidatos vaš o Nobelovo moľipen vaš o smirom, sajekh beršeste e Slovaťiko republikatar chudľas O moľipen vaš o manušipen. Sar e personalita hino andro Ľil pal e slovaťiko eksilovo kultura. Sas romano doktoris andal e Slovaťiko, aktivistas vaš o Roma, jekh nekhbuter prindžardo manuš andal romaňi emancipacia. Muľas 18. augustoste 2013 andro Bern, Švajčiarsko.
Dokumentimen: 30. novembros 2020

