Vladimír Oláh

E Šarlota Bottová hiňi e absolventka andal e Maškarutňi profesijakri škola andre Rimavsko Sobota, e kozmetička. O čitratuňipen chudľas te kerel imar kana phirelas pre maškarutňi škola, kaj sikhaven the e estetika. Pro ori pal e estetika sikhľiľas pal o portreta u sar len te kerel, paľis dureder sikhľolas korkori, prekal o informaciji save sas vaj pro internet, vaj andro džande kňižki. Lakri nekpašeder technika hin o grafitovo penkalos. Andro berš 2020 chudľas te kerel the le farbenca u dureder čitrinel o portreta.
Andro berš 2020 chudľas o štipendijum andal o Fondos vaš o pomožipen andre minoritengri kultura SR, kaj te kerel e kolekcija čitre – o portreta le romane lekhavnengre. 
Pro portretos hino o lekhavno Vladimír Oláh.
Vladimír Oláh, PhDr., uľiľas 22. majoste 1947 andro Stropkov. E maškarutňi bansko škola naagorinďas bijo love. Sar o profesijonalno slugaďis chudľas te sikhľol e andragogika pre Filozoficko fakulta pre Univerzita P.J. Šafárik Kašate. Andro berš 1984 chudľas o doktoratos. Le beršestar 1986 dživelas Prahate. Andro berš 1991 kerďas e romaňi kresťansko u sikhľuvibnaskri asocijacija – e Matica romaňi. Sar o jekhto romano autoris les ile andre čechiko Lekhavnengri komunita. Andro berš 2006 chudľas o Literarno moľipen Milena Hübschmannovakro vaš oda, so anďas andre romaňi literatura. Muľas 28.1.2012 Prahate.
Khatar:
https://www.lidovky.cz/relax/lide/zemrel-basnik-a-prekladatel-vlado-olah.A120129_180150_lide_sk
https://amariluma.romanokher.sk/encyclopedia/olah-vladimir-phdr/

Dokumentimen: 25. oktobros 2023