Zlatica Rusová

E Šarlota Bottová hiňi e absolventka andal e Maškarutňi profesijakri škola andre Rimavsko Sobota, e kozmetička. O čitratuňipen chudľas te kerel imar kana phirelas pre maškarutňi škola, kaj sikhaven the e estetika. Pro ori pal e estetika sikhľiľas pal o portreta u sar len te kerel, paľis dureder sikhľolas korkori, prekal o informaciji save sas vaj pro internet, vaj andro džande kňižki. Lakri nekpašeder technika hin o grafitovo penkalos. Andro berš 2020 chudľas te kerel the le farbenca u dureder čitrinel o portreta.
Andro berš 2020 chudľas o štipendijum andal o Fondos vaš o pomožipen andre minoritengri kultura SR, kaj te kerel e kolekcija čitre – o portreta le romane lekhavnengre. 
Pro portretos hiňi e lekhavňi Zlatica Rusová.
Zlatica Rusová, angomis Boldišová, uľiľas andro Kameňany (okresis Revúca). Te lekhavel chudľas andro berš 2004 sar 53 beršengri, kana phares nasvaľiľas u sas la buter kana te pisinel. O talentos pro vakeriben chudľas le papustar. Sar e autorka pisinďas o paramisa the bajki. Kerelas jekhetanes la redakcijaha Romano džaniben the le portaloha romea.cz andre Čechiko republika. Hiňi e džeňi andro Romano literarno klubos. Lakra literarno buťatar Paňeskeri kirajka kerďas e Themeskri džaňibnaskri biblijoteka andro Prešov e audio dramatizacija pre slovaťiko the romaňi čhib.

Dokumentimen: 25. oktobros 2023