Janette Motlová

Milan Berky (1961-) hino Lučencostar. Le beršestar 1979 kerelas buťi pro trastuno drom, pal o 35 berša našaďas e buťi. Sar bibuťarno chudľas te čitrinel o portreta. Leskre portreta pen dochudle ki o Sunto Dad František, vaj ki e prezidentka SR Zuzana Čaputovo. Leskro čitro – o portretos le themeskro manušeskro andro Irak hino pro poštova znamki andro Irak, kerde andro berš 2023. Bi o portreta čitrinel the o akti. Sas les o ekshibiciji na ča pre Slovaťiko, no the andre luma. 
Andro berš 2023 chudľas o financiji andal o Fondos vaš e minoritno kultura SR te kerel 30 portreta pre ekshibicija, save sikhavena le Romen the Romňen andal o kulturno, khetaňibnaskro u športovo dživipen. 
O čitre hin pro zoralo ľil formatos B2. E technika hiňi o angaroro. Sako portretos ľikerel e signatura le autoristar u datumos, kana sas o portretos kerdo. O portreta hine andro ramos. 
Pro portretos hiňi e Janette Motlová. O portretos sas kerdo andro februaris 2020.

Dokumentimen: 30. apriľos 2024